بابك ياكلب سديته من سنين
كلبي من العشك ماظل صبر عنده
وصيت الكلب لاتعشك انته النوب
لان حظك ردي وقسمتك بعد ارده
شو ياهو التحبة يخون بيك بساع
ويبيعك بالرخص ويذبك بشده
متكلي شجرالك شو تأمن الروح
بيد ابن الحرام الماحفظ وده
كل هذا الحجي ومافاد ابد وياك
ابعد الجرح عني وبيدك ترده
وجاي اليوم اليه بعشك من جديد
بس والله انت حقك فوت وتحده
صدك ياكلب لا ما الومك ليش
افتح بابك انته وبعد لتسده
لان هذا التحبة الكمر منه يغار
ويدنك على راسه ويبوسه من خده
بس كون انته يمي وابد ماتبعد
صدكني البعد لاجاب ولا وده
اعرف كلبي انه ومن يحب مجنون
دخيلك ابد لتخليه وحده
مو شاف القهر من عمره عشر سنين
لان ياهو اليحبه يصير ضده
وطعم الفرح ماضكناه ابد لليوم
لك حتى الفرح من بابي ماعده
اتعنه انه لبابك وابقى اشم بالكاع
اكولن بلكي جدمك فات واتعده
انته اخر عشك بالروح لا لتروح
الوب عليك مثل الطفل وبمهده
زرعتك ورده حلوة بوسط هاي الروح
وازكيك بدمع يا احلى ورده
اقسملك قسم بالخلق داحي الباب
كل مابعد حبك بيدي ارده
كل مابعد حبك بيدي ارده
